قلت الشعب ده مفيش فيه فايده ،والمصحف ما هيتهد إلا لو مسكه واحد وعلقه فى مروحه علشان يعرف ان الله حق ....لكن هتقول لمين؟.ومين اللى هيرضى يعلق حوالى تمانين مليون بنى آدم وربنا يخلى الصعايده 100 مليون لوحدهم معرفش ازاى !
قلنا الحكومه دى مش وحشه قوى قالوا علينا بتوع حزب وطنى قلنا الريس كان رده وحش على تصريحات الست ستيبى ليفنى(وزيرة الخارجيه الاسرائيليه) قالوا علينا اخوان ؛ قلنا يلا نبقى مع ربنا شويه قالوا يوه ده انت بقيت سلفى ...لكن انا هفضل عن رأيى ومش هغيره واللى عاجبه اهلا وسهلا مش عاجبه هياخد على قفاه ويبقى اهلا وسهلا مفيش ديموقراطيه ساده لكن فى ديموقراطيه بالملوخيه !
- بقولكم ايه تيجوا نحسبها بالورقه والقلم؟
- موافقين.
- ماشى انا هتكلم الاول،وهقولكم الحكومه دى وحشه فى ايه؟سؤال برىء خالص أهو
- دى الحكومه ياأخى بتاكل فى لحم الشعب
- قال يعنى الشعب عنده لحم ولا دياولو المهم ازاى؟
- فلوس قناة السويس
- يادى قناة السويس طيب ماشى وايه تانى؟
- الغاز الطبيعى
- ها وايه تانى ياعم الأمور؟
- الصادرات
- قال احنا بنصدر قوى .المهم زدنى ومتعنى
- المعونات
- ياتك ستين خيبه ومش مكسوف تقولها؟
- طيب تعرف بتتصرف فى ايه؟
- ايوه طبعا
- طيب قول ياأبو العريف
- بيصروفوها على المدارس وكمان المستشفيات
- وايه كمان؟
- آه كنت هنسى والطرق دول ياراجل عاملين حتة طريق يجنن بمشى عليه بالعربيه وانا حاسس انى ملك بس يا أخى كله مطبات
- معلش استحمل..فى حاجه انت ناسيها؟
- معتقدش
- طيب اقول انا فى حاجه انت ناسيها؟
- قول
- فى حاجه ياأبو العريف اسمها الدعم ولا سيادتك مسمعتش عنه؟
- لا طبعا الزيت والسكر والمكرونه والرز وخلافه
- مسمعتش عن الدعم على الطاقه دى تخرب ميزاية دوله لوحدها . ولا جيشك ياموكوس ما هو بياخد قد كده من الفلوس
- كلامك صح بس.....
- بس ايه؟
- بس فى بردو سرقه
- يامعلم انا مقولتش مفيش سرقه هو انا عبيط؟ طبعاً فى سرقه بس مش زى ما أنت فاكر يعنى كل عشره جنيه بيتسرق منها ربع جنيه عارف انها بتعمل كتير، بس ده عارف من إيه؟
- من إيه؟
- من فساد الشعب قبل فساد الحكومه والأتنين العن من بعض....ويلا بقى سلام علشان عاوز أنام
بقلم
المــــــــــــصرى
ليست هناك تعليقات:
إرسال تعليق