السلام عليكم ياأبو العريف
وعليكم السلام..ازيك ياأخى كنت فين من زمان؟
أهو فى الدنيا لكن قلت أبعد شويه وأخف رجلى عن الناس الحلوين اللى زيك وزى مابيقولوا فى المثل يابخت من زار وخفف....انت ايه اخبارك ياأبو العريف؟
أهو كله تمام الا حكاية الفلوس دى!
ليـــــــــــــــــــه؟
مرتبى زى ما أنت عارف صغير
قد ايه يعنى.
متتحشرش فى اللى ملكش فيه
حاضر..آسف....كمل
وأنا زى ما أنت عارف عندى زربة عيال
كام يعنى؟
هو انت غاوى تعرف كل حاجه؟ هقولك انا عندى هويدا وابراهيم وسوسن ومعاذ وفاتن و.....مش فاكر الباقى
طيب وانت عاوز اي يا أبو العريف دلوقت؟
يا أخى انت سلطه وتقدر تخليهم يزودوا المرتب شويه
انا سُلطه؟ ده انا بقيت سلطه بالطماطم...يعنى انت يا أبو العريف تخلف قرطة عيال وتقول ياحكومه اصرفى؟هو احنا ليه معندناش احساس؟...انت تعرف ان فى بعض الدول قررت ان اكبر عدد للعيال يبقى اتنين ولو عاوز تزود براحتك بس تعليمهم وسكنهم وصحتهم كله على حسابك ياخفيف
طيب اللى جرى جرى بقى كلمهم ليه طيب على سلفه
ليه دى كمان؟
اصل الجماعه حامل وانت عارف المصاريف ،ده غير الواد ولا البت اللى فى الجامعه واللى فى الاعدادى واللى فى الكتاب واللى فى الشارع كله كوم وأكلهم كوم ...مش عارف هجيب منين !
الله يكون فى عونك..انا بجد زعلان عليك يا أبو العريف ومش هيجيلى نوم من الزعل عليك يا أبو العريف.......وفجأه استيقظت من النوم وقلت "الله يخرب بيتك يا أبو العريف هو انت معايا حتى فى الكوابيس؟"
ليست هناك تعليقات:
إرسال تعليق