قفاه ده ولا وشه؟

الزمن ده متعرفلهوش شعر من دقن ولا حتى وش من قفا... كله بيضرب فى كله اشى امريكا بتحزر ايران وكمان بتضرب فى افغانستان وقال ايه تركيا هتدمر شمال العراق ؛ وربنا انا ما بقيت عارف مين اللى بيضرب مين.
ياخويا تلاقى واحده زى الست بينظيربوتو علشان بتقول لا تلاقى عمك برفيز مشرف قال ليها "بقى انتى اللى عامله فيها دكر؟طيب والله ماأنتى مكمله وهوديكى القبر على صاروخ"
وشوف الداهيه المنطقه تكون قاعده كافيه خيرها شرها وتلاقى اللى جايين يلعبوا ليها فى ودنها ويرقصوا عليها العن من شوشو(الشيطان) ويقولوا انتوا أقليه وبتتعاملوا وحش ولازم تنفصلم عن الجبابره دول والعينه واضحه ان كان فى السودان واقليم دارفور اللى ياعينى الناس فاكرينه صغير وميعرفوش انه قد فرنسا تمام ولا كوسوفو اللى صربيا هتضرب نفسها بالبلغه لو راح منها وغيرها كتير وبلاش نعد أكتر من كده علشان قربت أرجع.
ياربى ده كله كوم وموضوع النووى ده كوم والحاجه كونداليزا رايس ربنا ياخدها(قولوا آمين)قاعده تلف على الدول زى الصايعه ماتقلوش بتدور على عريس؟ ولا بتلف على بنى آدم صايع زيها يلف معاها انا مش عارف أصل زى ماسيادتكم عارفين شكلها يقطع الخميره من البيت . دى بقى تلف وتقول الدوله دى تعمل نووى ودى متعملش وأكنها ياخواتى بينزلها وحى من السما وبتتكلم ببجاحه زى ماتكون بتتكلم فى ملك ابوها اللى انا مش عارفه؟
اتكلمنا عن النووى واتكلمنا عن الاقاليم اللى عاوزه تنفصل ولسه ماتكلمناش عن الدول المحتله ومش هخرف وأقول احتلال فكرى وههيس وأقول احتلال منيل بنيله لأن فى ناس كتير مبتصدقش الكلام ده انا هقول حاجات واقعيه فمثلا الآنسه ستيبى ليفنى ربنا ياخدها(قولوا آمين)بتقولك مر مش دوله كويسه علشان بتسمح بتهريب السلاح والمسدسات والذى منه لقطاع غزه. انا هرد عليها وهقولها يابنت ستين فى عشره يبقى بستميه على طول وحياة امك انتى مش عاوزانا نعمل كده ليه هى دى مش حدودنا ولا تكونش حدود الحاج ليفنى ولا من املاك الحاجه ام ستيبى؟هى مش حدودنا نعمل اللى احنا عاوزينه فيها ؛ لكن الرد كان غريب وايه صادر عن الرئاسه وبيقولك مش عاجبكم شغلنا تعالوا اشتغالوا مكانا.

بقى ده اسمه كلام يا أولاد؟ انا هسيبكم تحكموا..........

تحياتى

المصـــــــــــــــرى