افهم بقى ياحمار

بلدى بتعجبنى علشان كده .. بحب بلدى علشان الحب ده ... شايف ف عيونهم خوف على بعض ,, شايف ف قلوبهم حنين للأرض .

بصوا ياجماعه هى حاجه انا شوفتها وعيشتها وبجد فرحت قوى بيها ... لما أدخل اعزى ف حد ميت (طبعا ربنا يرحمه ويرحمنا كلنا ) ,, والاقى قاعد قصادى واحد مسيحى داخل يعزى ف واحد مسلم .. بيسمع لقرآنا بانصات هو ممكن مش يكون فاهم كل اللى فيه .. بس على الاقل بيسمع .. قبل ما يدخل القاعه عمل تليفونه silent يعنى صامت .. وده على العكس من واحد مسلم والقرآن شغال الموبايل غنى .!

ودى مش أول مره أشوف الموقف ده .. لكن اثناء عزاء عمتى رحمها الله ايدى بجد وجعتنى من كتر الناس اللى توافدوا وخاصه الاخوه الاقباط من كل القرى المجاوره وقريتنا .

كان نفسى وانا قاعد ف العزا آخد صوره لعم ميلاد وهو قاعد وجاى يعمل واجب ,, ومش هكون مبالغ ان قلت ان دى مش مصلحه ,, لأن الفلاح البسيط ميعرفش يعنى ايه مصلحه ،، لكن يعرف انه لما يحب يحب بجد ولما يكره بردو يكره بجد ॥ ميعرفش ينافق ,, ولا يعرف يكذب ولا يعرف يعش ॥ يارتنى كنت واحد منهم(فلاح بسيط عايش وسطهم)

مش بقول الكلام ده على عم ميلاد علشان ابنه بولا صاحبى ,, لكن علشان كل الاخوه الاقباط ليهم تقدير واحترام , ايه يعنى مش من دينا ,, مش هيموتونا يعنى ,, ورب العباد هو اللى بيحاسب .

وعجبنى كلام واحد بسيطه قوى وانا كنت راكب العربيه فى طريقى للعوده الى المنزل من مدينة ميت غمر الى قريتى كانت بتقول لواحده مسلمه "الاختلاف بينا وبينكم ف الدين ,, لكن الرب واحد " .. ليه مش عاوزين نفهم ده !


بشوف كتير ان الاقباط بيجولى ف العيد وبردو انا بروح ليهم ف اعيادهم .

تخيل معايا كده لو جه عدو وحارب بلدنا .. اصحاب الملل التانيه هيحاربوا مع مين.؟؟

مش هتخيل ولا هتكهن ولا هعمل فيها الواد الخط اللى فاهم كل حاجه لكن هقولك بص للتاريخ .. لما الصليبيين وصلوا للشواطىء المصريه .. كانت كل البلد واقفه مسيحى ومسلم .. كله بيقول دى بلدى ولازم ادافع عنها ولو بدمى .

سامحونى لو اتهمت اللى قام بالهجوم على كنيسة وكاتدرائية نجع حمادى ب "الحمار" لانه بجد حمار ولا فكر وهو بيخطط ولا هيفكر . المشكله ان ف هجومه مات واحد مسلم يعنى من دينه .. يعنى للأسف هو مش كارة دين معين .. لكن كاره نفسه اصلا.

ولكن من باب الحياديه والموضوعيه التى تحتمها على دراستى ف الاعلام .. فلابد كما اننى تكلمت بما على ان اتكلم بما لى .. فالأخوه الاقباط هم الآخرون او فئه قليله منهم تريد وتطلب من النار ان تزداد اشتعالا .. وبينما كنت أتجول ف المواقع على الانترنت اذ بى افاجىء بموقع يدعى تاريخ أقباط مصر وأحدى عناوينه الفرعيه "الاعتدائات الدمويه على الأقباط" ، وعلى اليسار من صفحة الموقع الرئيسيه مكنوب بالنص " قال المسلمين : الله أكبر بعد أن طعن أحدهم راهبة بسكين " . وهذا اعتقد انه تصعيد من قبل بعض الاقباط .


ادعو الشعب المصرى باسمى واسمكم ان يتعاون وينبذ الخلافات جانبا وان يسعى لتحقيق هدف واحد وهو :-

مصـــــــــــــــــــــــــــــــــــــــــــــــــــر

_________________________________

*تحديث قبل النشر :

أحب ان اوضح لمولف الموقع المعنون "تاريخ اقباط مصر" بأن المسلمين لم يكونوا أبدا بالمحتلين .. المحتل أيها الاستاذ الفاضل هو من اغتصب حقا ليس بحقه .. والاقباط حينما دخل عمرو بن العاص مصر قابله الاقباط بالترحاب لا بالسيوف والمجانيق .. هكذا التاريخ يتحدث ... كما انك تدعى ان الاقباط قد قاسوا منذ دخول المسلمون مصر فتقول : "بالنسبة للأقباط فقد قاسوا من المسلمين منذ إحتلالهم مصر كما رأيت أيها القارئ ولم يرحموهم الفرنجه أيضاً" .. ولكن يكذبك بنو دينك الذين يذكرون فى أكثر من مناسبه ان المسيحيون لم ينعموا بأمان واستقرار خير من الفتره التى عاشوها بعد دخول المسلمين مصر . ...... أرجوا ان تعيد ترتيب اوراقك ثانية وتتذكر مسئولية الكاتب والمؤرخ فى نقل الحقائق والتراث.!!

_ _ _ _ _ _ _ _

بقلم

المصرى