القرايه واللى بيقرووووووووووووووووووووووووووووووووووا

كنت عاوز أكتب علشان خاطر بلدنا لكن جالى تاج ... وانا أحب قوى التيجان الواحد بيحس كده ان حد معبره



واهو ربنا كرمنى وجالى تاج من منى رغم انها زعلتنى وسألتنى على نتيجتى و طبعا عند النقطه دى انا بلف وبعمل راوند

على طوووووووول


والتاج بتاع قرآءه يعنى من الآخر اللى مش ليه فى حكاية القرايه دى يقراه وامره يفوضه لله

والتاج جاى مخصوص من مدونة احاسيس لصاحبة أجمل احساس "" منــــــــــــــــــــــــى ""

http://janeeyr.blogspot.com/

والتاج بيقوووووووووووووووووووووول


اسمع يامعلم

ماذا يمثل لك الكتاب؟؟

يمثل الكتاب صديق لا يكذب ولا يجامل بل يزيد الانسان علما ومعرفه .... شوف الاجابات النموزجيه

هل القراءة تغير من حالتك النفسية ؟ وما أثر القراءة عليك بوجه عام؟

طبعا لو انا زعلان بزعل أكتر ... ولو متضايق بفرح لا قصدى بزعل بردو ... مش تصدقوا انا بفرح جدا وبالذات لو

روايه كده بقى ايه الواد راح يصالح البت اللى بيحبها اللى كان والواد صاحبه اتدخل بينهم ... هى كانت روايه كلها غم

من الآخر .. انصحكم مش تقروها

والقراءه بتأثر عليا بوجه عام انها بتخلينى كده حاسس انى هعرف كل حاجه وطبعا عشم ابليس فى الجنه.


اول كتاب قراته واخر كتاب؟


اول كتاب أكدب عليك ... أكدب عليك ... أكدب عليك .. هنستهبل أهو .. لا انا قصدى أكدب عليك لو قلت انا فاكر بس

تقريبا كان المصحف لأنى قبل ما أتعلم القرايه والكتابه كنت بحفظ قرآن ... لدرجة انى كنت بسمع لزمايلى ... كنت بقى

وكان فعل ماضى مش هيرجع تانى وآخر كتاب قرأته ولسه بقرأ فيه ومش عاوز يخلص كتاب" لماذا اسلاميه .. معالم

الدوله القادمه" لانى بحب أعرف كل الافكار والتوجهات


اذكر ثلاث كتب أو قصص أثروا في حياتك وتحتفظ بهم ؟


مش فاكر بجد ... لكن أكيد روايات وبالأحرى هى مقولات ... أو مقتطفات او امثال بتدرج على السنة الابطال.

في أي المجالات تحب أن تقرأ ولماذا ؟

التاريخ ......... وبالذات المصرى بس مش القديم قوى ... بحب اشوف كنا ايه وبقينا ايه واحاول أخمن هنكون ايه


هل عندك مكتبة وكم عدد الكتب بها في تقديرك ؟


ايوه وربنا عندى وفى اوضتى والكتب اللى فيها واللى على الكمبيوتر واللى على الارض واللى على السرير واللى فى

الشباك ومننساش اللى تحت السرير يقدرو بحوالى 300 كتاب حجم كبير وحوالى 300 بردو كتيبات . محدش يتخض

أغلبها كتب مكتبة الأسره وعالم الفكر بتاع الكويت ام اربعه جنيه.

اذكر اسم كاتب تتمنى أن تحتوي مكتبتك كتاب له ؟

انا بصراحه اى حد أحس انه ممكن بضيف لفكرى او يعدل من اتجاهى طبعا اتمنى ان يكون ليه كتاب فى مكتبتى.

ماهو الكتاب الذي يرافقك في السفر ( غير المصحف )؟

مفيش لأنى مش بحب اسافر ولو سافرت بحب انام

ماهي الجريدة أو المجلة التي تتابعها وما هي أهم الأعمدة فيها؟

البديل بس طبعا هو المنحوس منحوس ............ هتقولى ليه هقولك علشان الجرنال قفل خلاص.

ماهو أفضل كتاب أهدي لك ؟ وأي الكتب تهديه ولمن ؟

لو ممكن اعدل السؤال هقول ان العيال ولاد اللذين اصحابى بيشحتوا الكتب ومش بيرجعوها .......... بس ماشى أنا

هآخد حقى ناشف.

ما هو المكان المفضل لك للقراءة ؟ وهل لك طقوس خاصة وقت القراءة؟

هو اى مكان بس يكون فى شوية ورود كده وحركات تشجع الواحد .......... ومفيش طقوس ولا بتاع دول همه يادوب

خمس دقايق بنقرأ فيهم.

الرواية – القصة القصيرة – الدين – السياسة – العلوم – الشعرمن الأحب لك في كتاب تلك الفروع ؟

هى السياسه بأمانه ..................... متعرفش بقى انا بحبها ليه ...... متقولش هشتغل رئيس جمهوريه (طبعا بعد

الشر عليا)

كمان انصحنا بخمس كتب ترى فيها إفادة عظيمة

كتير

زى

1/حوارات حول المستقبل ... د/عمرو عبدالسميع

2/الجذور الشرقيه للحضاره الغربيه ..... جون ام هوبسون

3/الأنماط الثقافيه للعنف ...... باربرا ويتمر

4/جامعة الدول العربيه ...... مجدى حماد

5/الاعلام فى القرآن الكريم ..... محمد عبدالقادر حاتم

رجاء ارسل التاج على الأقل لنرسخ مبدأ تبادل السلطة

انا مش هسمى حد لكن .... اللى هيعمل تعليق انا بهدى ليه التاج. آه مبدأ نفع واستنفع من الآخر بقى

بقلم

المصـــــــــــــــــــــــــــــــــــــــــــرى