لو عاوز تقرأ حاجه بجد بص على اللى تحت.
بناءا على طلب الجماهير الغفيره التى طلبت منى هاتفيا ان أكمل حكاية الفنان .. فها انا ذا البى النداء
_ فى مكتب الظابط
الظابط : انت اتمسكت متلبس وكنت لابس..صح ولا لا؟
الفنان : أيوه ياباشا .. هو انتم منعتم اللبس ولا ايه ؟ .. تحيــا الحكومه .. لكن انا من مكانى هذا أطالب ان يسرى القرار على الجنسين.
الظابط : انت بتتريق يابن الكلب؟
الفنان : ياباشا متغلطش.
الظابط : لا يا أخى اغلط انت كمان.
لعباس
الظابط :تعال خده على الدور التالت وخليهم يروقوه.
عبــاس : حاضر يافندم.
الفنان : يعنى ايه يروقوه ياحاج؟
عباس : يعنى يظبطوك.
الفنان : آه..... يظبطوك ؟ انتم عندكم هنا صالون حلاقه ولا ايه؟ طيب كويس والله المشوار جه بفايده .
عباس : استنى هنا .
الفنان : احنا وقفنا ليه؟
عباس : هنا أوضة التظبيط.
الفنان : والله العظيم ؟ ياراجل قول كلام غير ده ... مالها مدغدغه كده ليه؟
عباس : من كتر اللى اطحنوا فيها ... اقصد اللى اتظبطوا فيها.
الفنان : تلاقيها بقالها كتير متدهنتش.
عباس : لا دى بالذات لها دهان خاص كل شهرين .
الفنان : اكيد بقى بترشح علشان كده الدهان بيقع .
عباس : ممكن بردو !
الفنان : هو احنا هنفضل كده كتير واقفين؟
عباس : لا على بس ما بال يخلصوا على اللى جوه ... يظبطوه يعنى.
الفنان : دول باين عليهم بيشتغلوا بضمير خالص.
عباس : فعلا..هيظبطوك لحد ماتقول كفايه تظبيط.
الفنان : أول مره أشوف حاجه فى الحكومه بيشتغلوا يها بضمير .
عباس : اسكت (وفى الهاتف) حاضر يافندم.
الفنان: فى ايه؟
عباس : اللى جوه طالبينك.
الفنان : خلصوا للى جوه .
عباس : تقريبا خلصوا عليه.
الفنان : آه .. طيب ومالو .. هندخل بس وصيهم عليا ؛ انت عارف انى هقابل وكيل النيابه .
عباس : لا ماتخافش من غير توصيه.
الفنان : طيب ليه انت بتزقنى ما أنا داخل ...... سلاموا عليكوا يارجاله ... طيب حد يرد السلام .
بهيم رقم 1 : انت اللى عامل شغب؟
بهيم رقم 2 : لا وكمان بيرد على الباشا .
الفنان : هو انا دخلت أوضه غلط ولا ايه ؟
بهيم 1،2 : لا صح .. وطاخ .. طيخ ... طوخ ... وآه ياعين..آه ياليل..وسمعنى سلام لكل الضروبين.
_طلع الفنان من المكان وهو مش شايف أى انسان ولا حتى حيوان .. عينه طالعه لبره شبر ونص .. وهدومه متقطعه .. يعنى من الآخر معدش ينفع قطع غيار بنى آدم.
الظابط تامر : ايه هتعترف بذنبك ؟
الفنان : ذنب ايه يابيه ؟
الظابط : انت مالك !.. انت تمضى وخلاص .
الفنان : طيب مش أفهم انا عملت ايه غلط علشان ما أكرروش؟
الظابط : عباس .. خدوه روقوه .
الفنان : لا ياباشا .. خلاص همضى .
_ ومضى الفنان واتحكم عليه بست اشهر وهو مش عارف ليه وطلع بضمان وعيشه بقت تخنق . وعرف بعدين ان ده شهر اتناشر وفى حاجه مشهوره اسمها تقفيل محاضر وما بيصدقوا يحكشوا بنى آدم .
بقلم
المصــــرى
هناك ٣٦ تعليقًا:
هو الفنان ده مجاش مصر قبل كده ؟؟
ده عباس موجود في كل حتة أساسا
المصريين بيتعلموه قبل ما بيتعلموا يمشوا
---
وبعدين احنا تقفيل المحاضر عندنا شغال 12 شهر في السنة
---
تقبل تحياتي
باقولك ايه .. قول للفنان ده يحمد ربنا انها جت علي اد عباس وما قابلش فرج
ههههههههههههه
ربنا يبعدهم عن كل المصريين اللي بيحبوا مصر واللي بيحبوا ....... برضه مصر عشان محدش يفهمنا صح
ملحوظه يمكن ماتكونش عارف فرج مين اسأل سعاد حسني ف فيلم الكرنك
مدونتك جميله ودمها خفيف
تحياتي
علا بركات
خبيب
ربنا يبعدنا عن عباس وأعوانه وانت صح التقفيل على ودنه بس انا خلتها فى شهر اتناشر بس
تحياتى
علا بركات
شكرا لتشريفك واتمنى تتكرر
وربنا يبعدنا بعيد عن فرج
تحياتى
هو فيه تامر كتييير
وعباس أكتر
المشكلة بقى
إن إللى مدركين لعباس وتامر قليلين
وإللى بيقولوا لأ ليهم
أقل
لذا ومن هذا المنطلق
أحييك على شجاعتك الأدبية
وبالتوفيق إن شاء الله
عبااااااااااااااس مين ؟؟؟
بس ما علينا
يبقي انت اكيد اكيد في مصر
المدونه حلوة اوي وروحك جميله
سلاموووووز ورسي علي زياره مدونتي
وزة
صاحبنا الفنان كان مستنى يحلق ؟؟؟؟
ههههههههه
ده فنا على قده
ولا باين عليه عايش بره مصر
فى حد فى المحروسه ميعرفشى التظبيط
ده ولاد اختى فى الابتدائى وعارفين ان جوه القسم تظبيط من النوع العبيط
فزلوكه
نورك مغطى على الشمس
طبعا فى ناس مش واخده بالها من عباس لكن انا قاعد ليهم بالمرصاد
فزلوكه
نورك مغطى على الشمس
طبعا فى ناس مش واخده بالها من عباس لكن انا قاعد ليهم بالمرصاد
أنين الحزن
تشريفك ليه على راسى من فوق
عباس ده بقى اجمد واحد فيكى يابلد واحد زى ماتقولوا كده خنزير بس على كبير يعنى واحد ضخم وله شنبات (شوارب)
واحنا انشاء الله هنفضل فى مصر على طول
فرنسا هانم
خالتى فرنسا جاتنى لتانى مره لا والله ده انا كده اسيب القمر واطلع بالمدونه القمر وآخدها كجواز سفر
احنا عارفين التظبيط كله علشان انا جربت واتظبط قبل كده
هههههههههههههههههههه
ااول مره اسمع عن تقفيل المحاضر ده
اختراع ولا اروع
زى تقفيل السنه الماليه كده
ههههههههههههه
ماتقولش ايه اديتنا مصر قول هندى ايه لمصر
لاتعليق
د/أجدع بنوته
لو مش كنتى سمعتى عن تقفقيل المحاضر يبقى انتى مش عايشه فى مصر ... ويبقى أنت أكيد فى مصر ؛ بس لو شوفت الروتين
monaliza
احنا فعلا ادينا ايه لمصر علشان نطلب منها ؟ سؤال لازم كلنا نجاوب عليه
شكرا على زيارتك
ربنا يجعل كلامنا خفيف عليهم
ههههههه
احلى حاجة بهيم رقم 1
انا اقترح فعلا اننا نعملك براءة اختراع للقب دا عشان بجد فى فى مصر لو رقمناهم مش عارفة ممكن يوصلوا لايه.....بيقولك زمان كان شعار الشرطة فى خدمة الشعب...دلوقتى طبعا الشرطة فى افا الشعب
تحياتى و دعواتى بالصبر و السلوان عالشرطة ما هو كدا..اصبر عالجار السو يا يرحل يا تجيله مصيبة تاخده
و تقفيل المحاضر في شهر 12 بس
بيتهيألي شغال طول السنة
أمال تامر وعباس بيعملوا ايه أكيد مفيش حاجة تانية تسليهم
البوست واقعي جدا
تحياتي
ربنا يكفينا يارب
شر عباس وفرج وازداحمد
والله نظام فل الفل
وانت فاكر انا لية مش بعمل محاضر لاى حد
لانى مش حمل اى تقفيل للمحاضر
وسلم لى على عباااااس
تحيااااااااتى
gannah
يــــــــــارب ياختى يارب
dina
على رأى ستنا gannah ربنا يجعل كلامنا خفيف عليهم
تقفيل المحاضر على ودنه .. على رأيك ياكل ولاده عباس ابن فرناس ابن الــ ده؟
heba
على رأيك عباس يعنى ياكل عياله؟
فضفضه
يــــارب نستريح بقى من الروتين اللى جاى على دماغ أهالينا ده
المصرى بوست ولا اروع
بجد كنت سعيدة بقرائته
وبجد يا ريت تشيل تاكيد الكلمة دى بتزهقنى
واعتقد لو حطيت صورة تانية تعبر عنك يكون احسن
لكن بجد اللى يقرا المدونا من ورا لقدام هيعرف انك بتتطور جدا جدا جدا
صحفيه روشه
انتى مش عارف بتجاملينى ولا بتشفقى عليه ولا بتتكلمى صح .. لكن على كل حال انتى بتدينى أمل فى بكره
اتمنى نكون فى أحسن حال
مدونه جميله
ماشاء الله
الى الامام دائما
دة نذر من قليل يا عم مصرى
ربنا يبعدنا عن اقسام البوليس واللى فى اقسام البوليس
فنان أجنبى أكيد
التظبط أشهر كلمة فى مصر دلوقت
موجودة فى كل مكان
كل مكان فيه تظبيط
تحياتى
كاميليا
ظبطني يا مظبط قبل ما اي حد يظابطني ظبطني في رغيف العيش ظبطني في اي مصلحه يعني الراس الكبيره مظبطه الشعب وعايس عباس ولا اسمه ايه ده ميظبطش الفنان
بس انا حاسس انه كان بيستهبل كان عامل نفسه مش واخد باله لحد ما يتاكد ان التظبيط مش حلاقه التظبيط تظبيط
بس شوف الحكايه سبحان الله
الاول من مكتب واحد صغير لاوضة التظبيط وكان نفسه يقابل وكيل النيابه هههههههه
الحمد لله انه مقبلش رب كريم
بس هوه ده التطور الطبيعي للحاجه السقعه تبتدي مش فاهم حاجه وتنتهي فاهم كل حاجه
تحياتي صاحب عباس
هههههه
حسام يحيى
ربنا يخليك
لو كنت هطلع لقدام يبقى بيك ومعاك
شيمى
ربنا يبعدك انتى وبس أما انا فلازم أجرب كل حاجه
كاميليا
قد يكون أجنبى لكن بيتكلم عربى
أمير المصرى
أجمل حاجه فى الدنيا انك تعيش مش عارف حاجه لأنك لو عرفت هتتهبل
دمه خفيف جدا البوست ده
انا نفسي اولع في جهاز الشرطة عندنا واعمل واحد جديد واكتب في اللائحة ممنوع توظيف اي شخص اسمه عباس!
تحياتي
the queen
انت اللى دمك زى العسل
إرسال تعليق