ده مش تعليم ده بتنجان

تفتكروا فى مدرسة المشاغبين كان الكومديان الكبير عادل امام بيقول :

"هو ده بقى تعليم؟....فين أيام زمان ... ايام على مبارك وقاسم أمين وزكى جمعه ! مين زكى جمعه "

فعلا الراجل ده كان عنده حق ، وفين هى الأيام دى ؟...كان أيامها فى تعليم نقدر نقول عليه تعليم وتوسيع مدارك...اما دلوقتى فهو "بزرميط" ؛ ولا تعرف المتعلم من اللى مش.......متعلم طبعا .

أيا كان الأمر زى الدكتور (سامى النجار/رئيس شعبة صحافه عندنا فى القسم) مابيقول دايما أنا مش هعمل فيها الواد البرم وأكلمكم عن مشكله عامه وأتكلم عن حاجات مش بفهم فيها.... انا هتكلم عن حاجه خاصه عاوزكم تساعدونى فيها....ممكن؟

انا فى قسم اعلام ومن المفترض انى أكون شغال طول السنه مش عارف فى أبحاث أو تكليفات من أى نوع على الأقل احس انى عايش وممكن أشتغل فى يوم صحفى واعمل تحقيقات وافشخنات من دى .. وبردو أحس انى هكون سلطه خمسه وسبعين فى البلد دى ، لكن ولا أكنى بدن فى ميت غمر (بلدى) .. ولا فى حد برد .

عندنا فى القسم حاجات غريبه بعانى منها وأعتقد انى مش لوحدى وممكن أقول شويه منها :

أولها: عدد البنات فوق الكبير يعنى عددهم ممكن يوصل 430 ممكن خمسه فوق خمسه تحت ... أما عباد الله الغلابه فهمه من خمستاشر لسبعتاشر ولا فوق ولا تحت ويارتنى بشوفهم .

تانيها: ان الدكتور ولا الست الدكتوره يبقى ميعاده او ميعادها الساعه تمانيه ... البيه أو الحاجه ييجى الساعه احداشر أو اتناشر .. بمزاجهم زى ما نكون شغالين عندهم .... بيترتب على كده انى بتخنق من القعده فى الكليه فبروح ومش بحضر لأنى بزهق من كتر البحلقه فى البنات وخصوصا انهم آداب... وانتم أكيد فاهمين يعنى ايه كلية آداب فى البنات.

تالت حاجه: هى الكتب ؛ فعندنا مفيش دكتورر بينزل الكتاب الا بعد اكتمال الحجز .. وطبعا على ما الساده الطلبه تيجى تزور الكليه وتيجى تشرف كمان مره علشان تعرف الأسعار اللى ولا فى الخيال .. ونعملهم حفلة ترحيب علشان يحجزوا يبقى كل سنه وانت طيب نص التيرم فات وعلى ما الكتاب ربنا يسهل ليه وينزل تكون السنه خلصت وبدأنا سنه جديده .. وكل عام وانتم بخير .... لا كله كوم والست اللى بتقول اعملوا بحث (كل 25 طالب وطالبه) وقدموه وهاخده اراجعه وخدوه صححوه وبعدين آخده اكتبه علشان ينزل فى الكتاب ... طيب قولولى الكتاب هينزل امته الله يكرمكم ! ؟ الى جانب انى مش أعرف حد فى القسم علشان أعمل معاه البحث.

ملحوظه : مش كل الدكاتره كده لكن فى بعضهم بيلتزم بالمواعيد لكن للأسف بيشحور المحاضره يعنى بدل ماهى ساعتين بيخليها ربع ساعه ودمتهم .. وفى دكاتره بتاخد الساعتين لكن بتيجى بعد ميعادها بعشرتاشر سنه .. وفى اللى بيريح دماغه ومبيجيش خالص ...

بعد ده كله عاوزين التعليم يكون صح؟ وايه عاوزنى أنجح ؟ لا وألف لا

بقلم

المصــــــــــــــرى