بينما كنت اسير فى احد الشوارع الضيقه شديدة الضيق فى بلدتى ؛ واذ بى افاجىء بــ....بــ.....بأبوالعريف فجرى بينى وبينه اللقاء والحوار التالى:
أنا:ابوالعريف ! ايه ياحاج غايب بقالك كتير عنا ليه؟..هو احنا مش قد كده ولا ايه؟
هو:ازاى بس؟..انت انت كلك بركه.
أنا:برنا يخليك ويبارك فى عمرك..لكن بجد مكنتش بتبان ليه الشهر اللى فات ده؟
هو:انا قلت أنعزل عن العالم اللى بره اللى عامله زى الأسود ، دول ولا بيرحموا ولا بيسيبوا رحمة ربنا تنزل.
أنا:يعنى نويت تترهبن؟
هو:ايوه..تقريبا.
أنا:هو مسلم ولا؟
هو:لا مسلم طبعا..ايه ياعم انت ماشفتش البطاقه ولا ايه؟
أنا:لا مشفتهاش..هو انت علشان مكتوب فى البطاقه مسلم يبقى كده خلاص ؟ المهم فى الاسلام عندنا مفيش رهبنه والرسول ماتصلى عليه بيقول فى مامعنى كلامه ان اللى بيخالط الناس وبيصبر على أذاهم خير من المؤمن الذى لا يخالط الناس ولا يصبر على اذاهم او كما قال الرسول صلى الله عليه وسلم.......طيب كنت مش عاوز تكلم الناس ليه؟
هو:حاسس انهم دايما فى مشاكل !
أنا:ازاى يعنى؟
هو:يعنى انا زى ما أنت شايف دايما طهقان من عيشتى وبدعى انىأموت ؛ لكن يوم مابلاقى ساعه افرح فيها على طول تلاقى حد يا أخويه طلعلى زى عفريت العلبه وسودها فى وشى تانى..فقلت أقعد لوحدى زى مابيقولوا أنغلق على نفسى.
أنا:احب اصحح ليك حاجه فى الاول ياأبوالعريف المفروض ماتدعيش كده وتقول يارب أموت ولكن قول زى الرسول ما علمك وقول اللهم احينى مادامت الحياه خيرا لى وأمتنى ان كان الموت خيرا لى ..هو الرسول علمنا كده ولازم نقتفى أثره بمعنى لازم نعمل زيه ، تانى حاجه انت لما بتنغلق على نفسك مش هتعرف ايه اللى بيجرا فى الدنيا مثلا انت تعرف ايه اللى فى فلسطين ولا اللى فى كنيا ولا اللى فى الصومال ولا اللى فى السودان ولا حتى اللى فى غانا؟
هو:العلم علمك ياأستاذ..طيب ماتفهمنى كده بالراحه وانت عارف انى تقريبا عارف كل حاجه وهفهم بسرعه.
انا: والله انا حاسس ياأبوالعريف انك مش فاهم حاجه مش عارف ليه عموما....
هو:عموما ايه؟ مش هتقول؟ انا كده هفضل مش عارف خالص..انا ولا عندى تلفزيون ولا راديو ولا حتى ماكوة رجل.
أنا:كله منك..عموما مش موضوعنا،بص ياسيدى اللى فى فلسطين حصار وتجويع وقتل واعتصاب سواء ارض او عرض ..فهمت حاجه؟
هو:والله ما أنا فاهم حاجه.
أنا:ولاهتفهم.
هو:طيب ادخل على اللى بعدها.
أنا:فى كينيا فى حرب أهليه يعنىالأخ بيضرب أخوه والراجل بيضرب ابن عمه..فهمت دى؟
هو:أهى دى الحاجات اللى مش ممكن افهمها..خش على غيرها يمكن أفهم.
أنا:طيب..فى الصومال فى مجاعات وفى ناس مش لاقيه بق ميه تشربه..ها فهمت؟
هو:دى سهله بس بردو مش فاهمها ...غيره.
أنا:السودان فيه اقليم عاوز يستقل ومش هزود لأنك مش هتفهم.
هو:لا بس قول هو ايه احتمال افهم.
أنا:هو اسمه اقليم دارفور، وفى دلوقتى حاجه زى سلام بين اللى بيقولوا عليهم متمردين وبين الحكومه وربنا يستر من اللى بعد كده.
هو:فى ايه كمان؟
أنا:غانا فيها....
هو:فيها ايه دى كمان؟
أنا:فيها كأس امم افريقيا ومصر بتشارك فيها و...
هو:انت بتحكى فى ايه ده انا حافظ مواعيد الماتشات وبروح القهوه اتفرج عليها بس يا أخى خساره ان المغرب تطلع بدرى كده ولا السودان اللى ماكسبتش ولا ماتش...بس كلمه فى سرك شكلهم بينيموا الدول التانيه ويفهموهم انهم غلابه وبعدين يضربوا امريكا فى الخباثه.
أنا:أبوالعريف أنا حاسس انى ساخن والضغط اترفع وحالتى بقى الأعلم بيها هو ربنا سيبنى دلوقتى لو سمحت.
وانصرف ابو العريف وهو لايدرى ماذا قلت انا له وأيقنت ساعتها وساعتها فقط ان هناك انس شغلهم الشاغل الكوره والفن وغيرهما من الامور التى لاتستحق وهناك قضايا أخرى تستحق لا يولونها اى اهتمام مثل قضية فلسطين فى حرب عقائديه من الدرجه الأولى كيف لانسان مسلم لا يدرى بها ويدافع عن قضيته؟ وقضيه مثل السودان هى قضيه جيران كنا فى ذات يوم دوله واحده كيف لا نهتم بها؟ وقضية كينيا والصومال قضية قاره واحده تجمعنا بهم اواصر الصداقه كيف لا نعرفها لمجرد العلم بالشىء؟ كيف لانهتم....كيف لانهتم؟
بقلم
المصـــــــــــــــــــرى
هناك ٦ تعليقات:
وانا بمر على المدونات قرت كومنت ليك في مدونة واحد من الناس
اولا اهلا بيك في عالم المدونات
وتحياتى لدكتور مجدي الداغر لانى جبت امتياز برده في المدونه
وان شاء الله نتيجه الترم امتياز برده لكل قسم اعلام بفرقه الاربعه
اتمنى زيارتك في مدونتى المتواضعه
سلام
انا شوفت تعليقك لولا وبشكرك عليه
سلام
كلام سليم
الناس مش هتدافع عن قضايا متعرفش عنها معلومات
وبعدين انت بتتكلم على كنيا والصومال
فى ناس متعرفش اللى جوه مصر
زى البهائين ومشاكل تانية كتير
ملحوظة
انا مش لولا لانك قولتلى فى مدونتى يا لولا
صحفيه روشه
شكرا .... فعلا لكن الناس بتتناقض جدا فى تصرفاتها وصلنا لدرجه من التفاهه صعب تصورها
وآسف جدا على الغلط فى الأسم
والله يا اخ مصرى انت عندك حق الوعى فعلا مغيب جدا وبقيت كل حاجه كوره كوره والناس ما بقيتش تتاثر زى الاول باللى بيحصل فى فلسطين وغيرها وبقيت مشاهد الشهاء فى التليفزيون شئ عادى ما تهزش اللى بيتفرج ولا تفوقه من غفلته للأسف الناس مش حسه باللى بيحصل حواليها
ربنا يوفقك ويعينك
والله يا اخ مصرى انت عندك حق الوعى فعلا مغيب جدا وبقيت كل حاجه كوره كوره والناس ما بقيتش تتاثر زى الاول باللى بيحصل فى فلسطين وغيرها وبقيت مشاهد الشهاء فى التليفزيون شئ عادى ما تهزش اللى بيتفرج ولا تفوقه من غفلته للأسف الناس مش حسه باللى بيحصل حواليها
ربنا يوفقك ويعينك
إرسال تعليق