بيقولوا هيشيلوا الدعم.....طيب مايشيلوا الدعم..يعنى هنعمل ايه بالدعم؟ هنعمل بيه ايه لو ماكانش فيه بطاطس وغيرها من الحاجات اللى بتتقلى والسكر هنعمل بيه ايه لو مفيش شوية مايه نضيفه نعمل بيها كباية شاى ، والرز والمكرونه والاشتغالات التانيه دى ولا بتعمل اى حاجه وانتم أكيد عارفين لأنكم ولاد ناس بردو !!

لكن الغريب ياولادى ان شعبنا هيفضل كده مهما مر عليه من الزمن يعنى الحكومه وفرت حاجه مدعمه ... ايوه فعلا بيكون فى ضرب نار على الجمعيات اللى بتوزع وبتكون الجماهير قد عدد الجماهير اللى كانت فى فرح البت عديله الهبله اللى على أول شارع حامد ابن عمى خالد صاحبى . إلا اننا قلنا أهو أى حاجه تيجى من ريحة الحكومه ، وزى مابيقول المثل " اللى ييجى من الصعايده فايده " وبالرغم من كل ده تلاقى الناس بتاخد الحاجه المدعمه وتروح تقعد بها فى " طشت " وتبيعها بأسعار أقدر أقول عليها نار ، ممكن متصدقوش دى لكن دى لكن اللى هتصدقوه قوى وبتشفوه بعنيكم ..... قد مابيكون طابور العيش فى المخبز البلدى مليان وفيه ضرب وبالسنج والمطاوى والكرابيك وكل الاسلحه البيضاء منها والخضراء إلا ان معظمهم ياواقف وبيتزاحم علشان يجيب للفراخ اللى على سطح البيت أو بيجيب ويبيع بسعر فى أوقات أكتر من ضعف تمنه ... بالذمه ده شعب؟

لكن طبعا حكومتنا ربنا يديها على قد نيتها قالت لازم نعوض المواطن وهنديله دعم نقدى وأنا بقولهم جاتكم ستين خيبه ...دعم نقدى ! هنعمل بيه ايه؟ ده سعر البيضه بقى ستين قرش وسعر كيلو الدره الاصفر قرب أو عدى جنيه ونص بعد ما كان من سنتين خمسه واربعين قرش ....... هنعمل ايه بالكام ملطوش اللى هناخدهم منكم ؟ لا وايه الحكومه استاذه ورئيسة قسم إلهاء المواطنين كل يومين يقولولكم هينزلوا العيال فى بطايق التموين ويقولك مش عارف ايه .... تانى مره جاتنا ستين خيبه.

بجد اشهد للحكومه قدرتها على أزاى تجيب فلوس من المواطن وأحب أقول كمان ان الحكومه عامله زى شركات الاتصالات اللى احنا عارفينها علشان منعملهاش اعلانات هى مش محتاجه اساسا ، المهم بتعرف ازاى تضحك علينا وبتدى الفلوس باديها اليمين وبتاخدها تانى بالشمال وطبعا احنا كفايه نشم ريحة الفلوس ... ريحتها لذيذه..أهىء أهىء

وتحيه وعرفان وبتنجان للفنان محمد شومان اللى استعانة بيه حملة " الضرائب .. مصلحتك أولا " ، وبجد حاجه هيفضل التاريخ شايلها لعمو يوسف بطرس مش عارف ايه ... عموما همومنا كتير .. وأنا ان كنت بقول الحكومه وقاعد أغلط وأقول كلام ماينقالش ف أنا قلت بردو على الشعب فاضل بس العالم ولاد اللذين اللى بيدخلوا يوقعوا فى النص .. وده من خوفى على بلدى لأنى بجد بعشق تراب وطنى

بقلم

المــــــــــصرى